حذيفة ساب الاكل وغمض عنيه واخد نفس وبص لوالده: كنت عايزك يا حاج بعد الاكل في موضوع مهم. الحاج بلال: قول يا شيخ انا خلصت اكل خلاص. حذيفة بحزن: انا بعدت حد ينضف الشقة التانية وهنقل فيها من الليلة وهبقي معاكم دايما .بس ..ببس خلاص مابقاش ينفع افضل هنا ولا ابات معاكم. الحاج بلال بص لفريدة وچوري واتنهد : فاهمك يا ابني ومقدر..عموما انت مش هتروح بعيد يعني ..الباب في الباب ولو حصل حاجة لقدر الله هتلحقنا بسرعة..
چويرية حست انها سبب في فرقتهم وبعد حذيفة ..كمان واضح عليه ان بعده السنين اللي فاتت واللي كانت بتشتكي منه ماكنش بعد …البعد الحقيقي هو اللي بدأ وهيبدأ …فهمت ان حذيفة مش هيكون زي زمان.
ولا حتي زي من ساعات…ده حتي النظرة مش عايز يبصها في عنيها…دموعها نزلت بزيادة وعياطها صوته علي ..فريدة طبطبت عليها. فريدة: مالك يا نور عيني ليه العياط..!؟ چويرية بدموع وهي بتبص لحذيفة: ابيه خلاص هيبسبنا لوحدنا مش هيقعد معانا وانا السبب….ابيه مش هيتكلم معايا تاني …
حذيفة قلبه بيتعصر من حزنه علي دموعها ..كل اللي نفسه فيه دلوقتي يضمها لح.ضنه ويحسسها بحنانه..ح.ضنه اللي حرمها منه وحرم نفسه منه من ٣سنين فاتت بس كان عوضه انها لسة قصاده ومعاه ..لسة بيبص في عنيها ..لسة بيتابع شقاوتها وضحكتها لكن دلوقتي خلاص كل ده انتهي…..وهو ساكت مش عارف يرد ولا يوعدها بحاجة. فريدة ابتسمت: مين قال كدة بس يا ست البنات…ابيه هيفضل معانا..ده يا دوب هينقل الشقة اللي قصادنا..وبعدين مين قال انه مش هيكلمك ..لييه بقي هيقاطعك…بس يعني في حاجات بس صغيرة هتتغير مش كل حاجة…وبصت لحذيفة وغمزته….ما تقولها حاجة يا حذيفة هتفضل ساكت كدة..
حذيفة اخد نفس وبثبات من غير ما يبصلها: چوري اهدي وبطلي عياط …انا مش هسافر .انا جنبكم هنا..ثم مين قال مش هكلمك ..طبعاا هكلمك واي وقت عايزاني كلميني ..بس يعني زي مافهمتك كتيير في حدود بس .دي كل الحكاية.. چوري قامت وبصتله بعتاب وحزن: اعمل اللي يعجبك يا ابيه …عن اذنكم ..انا عايزة انام .
حذيفة غمض عنيه ودــ,,ـــــفن وشه بين ايديه وبينه وبين نفسه : ااااه يا چوري اعمل ايه بس يا رتني كنت محرم ليكي ..بس للأسف انا مش كدة…وده شرع ربنا قبلي وقبلك يا حبيبتي ..يارب حن عليها واشرح صدرها..دي مالهاش غيري وانا مش في ايدي اعملها حاجة… فريدة بحنان طبطبت عليه وابتسمت: معلش حبيبي ..عيلة ومش مستوعبة..بكرة تتعود…وبعدين ماهو ده كان المفروض يحصل من سنين انت كان لازم تتجوز وتنقل الشقة التانية .وهي كانت هتفهم وتتعود ..بس انت اللي عمال تأخر وتأجل …
خذيفة قام بعصبية : يا امي بالله عليكي ده وقته بس …احنا في ايه ولا ايه ….انا نازل الورشة عندي شغل كتير ..وانتي معلش ابقي كلميها وفهميها…م\اتخلهاش تنام معيطة.. فريدة اتنهدت بتعب من عناده : طيب حاضر اتكل علي الله انت.. حذيفة بص علي اوضتها بحزن: امي امنتك م\اتخليها تنام معيطة بالله عليكي قوميلها دلوقتي… فريدة : يا ابني حاضر والله حاضر روح انت بس.. حذيفة نزل بضيق وتعب ودخل ورشته وفضل تايه وسرحان..ودخله مصعب. وكلمه كتيرر وهو سارحان
مصعب بقلق: حذيفة ….حذيفة مالك يا ابني شكلك متغير كدة ..ومش حاسس بيا حصل حاجة!؟ حذيفة انتبه ليه واتنهد: اهلا يا مصعب..اقعد ..مافيش انا كويس بس شوية دوشة في دماغي كدة…طمني عنك انت عامل ايه خلاص جهزت نفسك يا عريس. مصعب ابتسم: ههههههههههه.ايوة يا عم جهزت نفسي ادخل القفص بإرادتي وانا خارج قواي العقلية.. حذيفة ابتسم: هههه خارج قواك..ليه ضحكت عليك ولا شربتك بنج..
مصعب اتنهد بحيرة: مش عارف يا حذيفة ..برغم ان ايمان بنت ناس وكويسة وعجباني مش هنكر..بس مش اللي هي يعني سارقة النوم من عيني…ولا هبقي همو.ت واشوفها..اللي هي يعني جوازة عادية تعود ..زمايل في نفس الشغل ومجرد اختيار عقلاني مش اكتر … حذيفة عقد حاحبه: انت بتهزر صح..ده انت وهي مش مبطلين رغي وكلام بقالكم سنتين ومخطوبين بقالكم سنة ايه بقي ربنا بهديكم ده انتم مفورين دمي من علاقتكم دي…وجاي وانت خلاص هتتجوز بحلال ربنا تقولي مش حاسس ومش عارف ايه …ايه يا مصعب استهدي بالله كدة وقول هديت..
مصعب سند راسه علي الكرسي: عارف يا حذيفة انا كنت مأخر جوازي كل السنين اللي فاتت دي ليه. ..يمكن انت متأخر بتقول مش لاقي قبول..انا بقي كان طموحي اكبر بكتير..كنت عايز احب….احب واعش/ق ..وابتسم وحذيفة بيتابع تعبيراته بفضول…نفسي اشوفها عنيها تخطفني …ابصلها ما ابقاش عايز ولا قادر اشيل عنيا من عليها….نفسي استناها تفتح شفايفها وتتكلم …واسمع صوتها يرن يطرب قلبي….نفسي لما تقول اسمي جسمي يقشعر اكني اول مرة اسمعه…نفسي لما تكون معايا يتحبس النفس وقلبي يدق….نفسي لما لمس ايديها كل ذرة فيه تتحرك وتندهالها..ااااه يا حذيفة كان نفسي احب …احب حب بجد…مش مجرد بنت حلوة ومناسبة وخلاص…
حذيفة كان بيسمع كلام مصعب وقلبه بيدق ياتري هو كمان كان مستني كدة…بس السؤال هو حس بكل ده بس مع واحدة بس ….وفي اللحظة دي اكنه لدغه عقرب اتنفض وقام زي المجنون … مصعب قام بقلق :مالك يا ابني حصل ايه !؟ حذيفة بتوهان وضياع: ااانا…اانا ..لا لا اانا.رايح الحمام …. حذيفة دخل بسرعة الحمام وقفل الباب وقلبه بيدق بعنـ,ـف وعقلة بيرفض الفكرة …فتح المياه وفضل يغسل وشه بجنون واكنه بيغسل عقله من جواه ويطرد اللي فكر فيه..وبص لنفسه في المرايا بيسألها ويعاتبها ويعنـ,ـفها…
خذيفة بأنفاس سريعة اكنه كان بيجري امتار كتيير: انت مجنون صح.!؟ قولي انك اتجننت….لييه هي اللي جات علي بالك اول ما سمعت كلام مصعب….لا لا دي تبقي كارثة …انت كدة محتاج تعقل . دي …دي ….دي متربية علي ايدك…دي .. دي اتولدت علي ايدك….لا لا …اانت بيتهيألك…ااانت بس متأثر من اللي حصل النهاردة..ومن الموقف بتاع الصبح…ايوة …ايوة صح…..ووبقوة ماهو مش معقول اخرتها وبعد كل ده يوم ما تحب تحب چوري…انت مجنون يا حذيفة ..مجنون… مصعب قلق وخبط عليه: حذيفة ..انت كويس طمني عنك…
حذيفة بتماسك :ااااايو …ايوة كويس يا مصعب ما تقلقش .اانا خارج حالا اهو.. حذيفة بص في المرايا وهو \ان من نفسه ..وبغيظ..اانت شطانك وسوسلك اكيد…ايوة انا هتوضي …ايوة هتوضي واخرج اصلي…والفكرة البشعة دي لازم تخرج من راسي لازم … حذيفة فعلا اتوضي و خرج وصلي ركعتين ومصعب قاعد مش فاهم هو فيه ايه ولا ايه اللي حصل خلاه يتغير كدة..قرب منه بهدوء. مصعب: هو انا زعلتك في حاجة…علي فكرة كلامي ده كان عاي سبيل الاماني انا مش قصدي اني اتغزل في حد معين …كمان ايمان خلاص هتبقي مراتي يعني لو انت شايف اننا تجاوزنا في اي حاجة ايام الخطوبة.
حذيفة هدي شوية بعد. صلاته بس لسة اللي خطر في باله موجود وده مخليه متوتر ومتلخبط: لا يا مصعب مافيش حاجة…كل ابن آدم خطاء..وان كنت تجاوزت في شئ من كلمة او نظرة وقت الخطوبة توب وربك تواب رحيم .وان شاء الله يتم زواجكم علي خير وربنا يرزقكم الفعاف يارب .. مصعب ابتسم: طيب انا همشي بقي وم\اتنساش الفرح الخميس اللي جاي بلغ الحاج والحاجة وچوري ..الا صحيح هي عاملة ايه ..واخبار المدرسة ايه!؟ حذيفة قلبه دق بقوة من اسمها وسؤال مصعب عنها: كويسة…كويسة والدراسة بخير هانت امتحانتها علي الابواب..
مصعب: هههه..لسة مطلعة عنيك في المذاكرة ..دي بنت مشاكسة انا عارف.. حذيفة عقد حاحبه بغيرة ..مش متحمل مصعب يتكلم عنها ..ده كان مقبول بالنسبة ليه الاول لانه متخيله غيرة علي طفلة رباها.لكن من اللحظة اللي كل شئ اتغير وخطرت في باله وفي قلبه الدقة اللي كلام مصعب شاور عليها اكنه بيقوله لا الدقة دي ..غير كل دقة قلبك بيدقها…الدقة دي دقة حب من نوع مختلف ..دقة اسمها چوري… حذيفة بتحفظ: يعني ..ماشي الحال .المهم …انت ربنا معاك في فرحك ده..قولي محتاج حاجة احنا اخوات ..
مصعب بتردد: بص هو علشان كدة انا متردد اطلب منك… حذيفة بعصبية: انت مجنون صح..انت محتاج حاجة ياغبي ومخبي عليا.انطق عايز ايه. .. مصعب بحرج: اهدي بس كدة هفهمك.شوف انا كنت محتاج 5000 جنيه فاضل شوية حاجات وبصراحة انا بكره القسط ..وكنت عايز اجبهم بالمرة علشان انت عارف بعد الجواز المصاريف بتزيد ومش هعرف اجيب حاجة..ووعد هردهملك من اول قضية في المكتب الجديد ..انت عارف المكتب وتجهيزه والجوازة شطبوا عليا فلست…
حذيفة اتنهد بضيق وفتح الدرج وطلع الفلوس وادهاله: بعد كدة تتردد هض*ربك وانت عارف ايدي هتوجعك…احنا مافيش بينا لا حرج ولا تردد…فاهم…وبعدين تردهم وقت م\اتردهم…ولعلمك دول غير هدية فرحك..انت اخويا وبتتجوز لازم افرحك فرحة كبيرة…ومكتبك الجديد ربنا يبارك فيه ويرزقك فيه بكل الخير والحلال ويبعد عنك شره يارب . مصعب ابتسم بود: راجل يا حذيفة ربنا يخلينا لبعض…..حاجة كمان بقي.. حذيفة بمزاح: انت شكلك طمعت صح..انا قولت اخوات بس بالراحة. مصعب: ههههههههههه…ماشي ياعم هطمع ماليش دعوة .. انا عايزك تزفني بعربيتك انت عارف اخوك ماعهوش عربية …ولسة هأجر بقي واغرم.كفاية غرامة…
حذيفة ابتسم لانه بيجهزله هدية تليق بيه وكبيرة : عنيا يا حبيبي واجمل عربية هتتزين علشان اجمل عريس ..ربنا يسعدك ويفرحنا بيك… *********************************
مر يومين وحذيفة لسة فكره مشغول وعصبيته بتزيد و\ه بيكبر من نفسه قبل اي حد….كل لما يقرب منها يتجنن..يبعد عنها يتجنن اكتر من البعد والتفكير ..بيوصلها الصبح وبعد الظهر المدرسة وهو طول الوقت حابس نفسه من قربها ومن جهاد نفسه انه يبصلها ويشبع عنيه منها ومن جمالها.. وهي طول الوقت حزينه من تغيره ده.. وتخيلت عصبيته وا\ه دول بسببها انها بتكبر ووحملها عليه بيكبر….وجه قبل فرح مصعب بيوم واخدها يشتريلها فستان تحضر بيه الفرح….وكان يوم متعب وكله جنون بسبب غريته من كل حد يبصلها ..حتي الستات والبنات بتتعجب من جمالها. ..وهما في محل الفساتين…
حذيفة بضيق: يا مدام الله يرضي عليكي ..دي حاجات سوارية ومش مناسبة لسنها. انا عايز حاجة هادية ورقيقة تناسب سنها . البياعة: يا شيخ مش قولت فرح ..تبقي الحاجات دي مناسبة…كمان هي شكلها هيبقي فيهم مناسب هي ماشاء الله طويلة ومش باين عليها سنها اكنها عروسة كبيرة… چوري بتكتم ضحكتها من شكل حذيفة الغيران…وهو بيغلي: استغفر الله ..ياستي قولي اللهم بارك..دي عيلة اصلا عروسة ايه بس…بصي انا همشي واضح انك مش هتساعديني.. البياعة : ههههههههههه…خلاص.. خلاص يا شيخ مايبقاش خلقك ضيق كدة…انا عرفت طلبك وهجيبه تعالي معايا فوق..
حذيفة اتنهد ومشي خطوات معاها وقبل السلم .. ثانية بس يا مدام انا هطلع وانتي هاتيها وتعالي ورايا… طلع حذيفة هو الاول والبياعة استغربت وچوري ضحكت ووشوشتها: علشان مايبصش علينا واحنا قصاده.فطلع هو الاول واحنا وراه.. البياعة: هههه ده ماشاء الله عليه ..راجل بجد..ربنا يحميه ويخلهولك…تعالي بقي انا هجبلك شوية فساتين يجننوا زيك كدة يا قمر انتي… طلعت معاها چوري واتفرجت علي الفساتين مع حذيفة…وحذيفة اختار فستان هادي وناعم يشبه چوري تمام..ابتسم: چوري قيسي ده ..
چوري ابتسمت : جميل اوي يا ابيه هقيسه… دخلت چوري قاست فستانها والبياعة جهزتلها حجاب مناسب ليه يشبهه..وساعدتها في لبسه وخرجت لحذيفة ….حذيفة لسة بيفرج ويشوف حاجة مناسبة كمان وفجاة هي خرجت قصاده وعنيه وقعت عليها وغصب عنه عنيه ثبتت مش قادر يبعدها….من جمالها…اكنها رسمة علي لوحة بتنطق وتتكلم ..قربت منه بتبتسم بخجل من شكله وهو معحب بيها. للبياعة: ماشاء الله عليكي…جميلة والفستان ..اكنه اتعمل علشانك وليكي… حذيفة ابتسم: اللهم بارك..انتي جميلة اوي فعلا…انتي بتحلي اي حاجة تلبسيها …
چوري مبسوطة انه بصلها ومابعدش نظره عنها: بجد يا ابيه انا حلوة عجبتك يعني…يعني انا كبرت صح .. حذيفة اكنه كان تايه وكلمتها فوقته ورجعته للواقع.بعد نظره عنه واهو بيستغفر ويأنب نفسه من تاني: احممم..اااه ..ااه جميلة والفستان جميل ..ادخلي بقي غيري هدومك اتأخرنا… چوري لوت شفايفها ب\: اهو غض بصره تاني…ده ايامي سودا شكلها كدة…اوفففف .حاضر هغير هدومي…
حذيفة غمض عنيه ب\ وغيره: ياربي اعمل ايه بس.. فتنة واتفتنت بيها …دي معايا وفي بيتي..هعمل ايه بس…وافتكر الفرح ..يا نههههاري..ولا الفرح ده كمان لما تروح وهي كدة ..هيحصل هناك ايه….ده انا اللي اسمي انا…هتجنن من جمالها..اومال بقي الناس ولا الشباب الصغيرة..يارب . يارب ..ارحمني انا كدة بضيع وهضيعها…وهضيع الناس كمان …. ((((الفصل السابع)))) بقلم ريحانة الجنه مر اليوم وحذيفة عقله مش بيهدأ شايل هم التجمع والفرح والناس …لحد ما عدي اليوم وجاء الليل وبدأ الكل يجهز ..
چويرية لبست فستانها وحجابها وكانت جميلة جداااا وكانت واقفة قصاد المرايا بسعادة وبرائة وبتلف حاولين نفسها وبتضحك..واتنهدت بحلم برئ…يا تري هعجبك يا ابيه ..اممممم..وعقدت حاجبها…يا خوفي لللبنات تفضل تبصلك وتعاكس فيك…وانت جميل كدة وتجنن .ااااه طب اعمل فيك ايه بس ..والله لو واحدة بصتلك لخرم عنيها واعميها هاه بس …. ودخلتلها فريدة بتضحك علي حالها.. فريدة : ههههههههههه..يخيبك يا چوري انتي اتجننتي ولا ايه بتكلمي نفسك يا بنتي ….سلامة عقلك … چوري : ههههههههههه…اااه اتجننت يا مامتي وربنا يسامحه اللي مجنني بقي …
فريدة: ههههههه .وده يبقي مين بقي ده ان شاء الله… چوري غمضت عنيها واتنهدت: عقلي يا ماما عقلي …اللي تعابني..وبعدين ضحكت بشقاوة …بس قولي بقي ايه رئيك فيا وفي فستاني حلوة صح .. فريدة بإعجاب: بسم الله عليكي زي القمر عقبال فستان فرحك وربنا يديني العمر كدة والبسهولك بإيدي وافرح بيكي يا حبيبة ماما.. چوري ح.ضنتها بقوة وحب: حبيبتي يا مامتي …احن ام في الدنيا…عارفة متهيألي ماما الله يرحمها ماكنتش هتجبني كدة ولا هتكون حنينة عليا للدرجة دي..
فريدة ابتسمت بحزن خرجتها من ح.ضنها وهي بتظبطلها حجابها: اوعي تقولي كدة….مهما عوضناكي مافيش حد بيعوض الام والاب…ودنيا الله يرحمها كانت نسمة وحنية الدنيا فيها…دي في الفترة اللي عاشرتني فيهم ….بقت بنتي والله ..الله يرحمها كانت روحها فيكي… چوري بحزن: هو انا ليه ماحدش من اهل ماما وبابا بيسأل عني ولا بيزرني…انا حتي ما اعرفش شكلهم …هما للدرجة دي مش بيحبوني…
فريدة بضيق من سيرتهم: لا طبعااا يا حبيبتي ..ازاي بس. زي ما تقولي كدة ده كان طلب حذيفة انك تفضلي معانا وم\اتروحيش عندهم..والسنين بقي لهت كل واحد في حاله ماحدش بقي فاضي لحد…المهم سيبك بقي من كل ده وياللا بينا حذيفة مستنينا برا هو والحاج مش عايزين نتأخر عليهم لسة حذيفة هيوصلنا الفرح ويرجع لمصعب علشان يجيبه هو وعروسته بعربيته… چوري بتردد: طيب ..طيب ممكن طلب وعلشان خاطري اوعي ترفضي.. فريدة :هاه خلصيني عايزة ايه؟!
چوري بقلق ورجاء : عايزة احط روچ ..حاجة خفيفة كدة…وحياتي يا مامتي وحياتي. فريدة بصدمة: يالههههوي ..روچ !؟ وده جبتيه منين …كمان ده كان حذيفة يكس\ر رقبتك .لا لا عدي الليلة علي خير مافيش الكلام ده. چوري برجاء واستعطاف: وحياتي يا مامتي …ااانا اخدته من واحدة صاحبتي في المدرسة …علشان خاطري..ده فرح ومش كل يوم هيجينا فرح…وافقي واقنعي ابيه وحياتي يا احلي ماما وحياتي. فريدة بتضعف قصادها وقصاد رجائها: بس. ببس …حذيفة يا چوري مش هيعديها….بس هقول ايه انتي كدة من يومك واجعة قلبي ومجنناني..بس بشرط يادوب كدة حاجة خفيفة مش عايزين الليلة تقلب بغم ..
چوري بتتنطت من السعادة : هههه.حبيبتي يا مامتي يا سكر يا جميلة يارب تحجي يارب .. فريدة بتضحك من شقاوتها:هههههن.ااااه منك بلفاني كدة وواكلة عقلي.. ياللا بقي بسرعة ..
چوري اخدت الروچ وحطت منه وبرغم ان لونه هادي وهي ما زودتش منه ..الا انه كان قريب من لون فستانها وخلاها جميلة اكتر وظهر جمال شفايفها ووشها كانت ملامحها بتنطق اكتر …خرجت مع فريدة وحذيفة قاعد مستني برا وبيشرب قهوة ..ولما خرجت رفع عينه فجأة وشافها ….والغريب انه بقي كل ما عنيه تقع عليها قلبه يدق بعنـ,ـف اكنهه اول مرة يشوفها …ابتسم بإعجاب من جمالها وبرائتها ….بس عنيه وقعت علي شفايفها اللي زادت جمال مع الروچ…اتلخبطت وبعد نظره عنها والقهوة اتدلقت منه علي الارض…
